Architektur der Renaissance

Dr Archidekturstiil vo dr Rönessans isch in dr Zit zwüschen em früeje 15. und spoote 16. Joorhundert in verschiidene Regione vo Öiropa verbräitet gsi. Er het bewusst bestimmti Elimänt vo dr Römische Antike welle widerbelääbe und witerentwiggle. Die klassischi griechischi Archidektuur, wo vor dr römische choo isch, häi d Archidekturtheoretiker vo dr Rönessance nid in Betracht zooge. Stilistisch isch d Archidektur vo dr Rönessans noch dr gotische Archidektur choo und isch vom Barock abglööst worde. Si isch z Floränz under anderem vom Filippo Brunelleschi entwigglet worde, het sich denn schnäll uf anderi italiänischi Stedt usbräitet. Dr Stiil het sich denn zu underschiidlige Zite und mit underschiidliger Wirkig im öiropäische Usland wie Frankriich, Dütschland, Ängland oder Russland verbräitet.

Dr Rönessansstiil bedoont d Sümmetrii, d Broporzioon, d Geometri und wie d Baudäil aagordnet wärde, wie mä s in dr Archidektur vom Alte Rom in e hufe erhaltene Bauwärk het chönne gsee. D Aaornig noch festgläite Reegle vo de Süüle, Pilaster und Lisene, dr Bau vo Bööge, Kupple oder Nische het s komplexe Broporzioonssüsteem und die unregelmässige Brofiil vo de gotische Baudäil und Bauwärk abglööst.